Հանրային հեռուստաընկերության գործադիր տնօրենի թափուր պաշտոնի մրցութային հանձնաժողովի կազմը հաստատվել է։ Այդ մասին ֆեյսբուքյան իր էջում տեղեկացրել է ԱԺ պատգամավոր Վահագն Թևոսյանը:
Մրցույթի կազմակերպման և անցկացման ժամանակավոր հանձնաժողովում ընդգրկվել են ԿԳՄՍ նախարար Արայիկ Հարությունյանը և Ազգային ժողովի գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հարյապետյանը։
Հանձնաժողովի անհատական կազմում ընդգրկվել են նաև Արա Շիրինյանը՝ Հանրային հեռարձակողի խորհրդի նախագահ (հանձնաժողովի նախագահ), Տիգրան Հակոբյանը՝ Հեռուստատեսության և ռադիոյի հանձնաժողովի նախագահ, Նունե Սարգսյանը՝ «Մեդիա նախաձեռնությունների կենտրոնի» գործադիր տնօրեն (հանձնաժողովի քարտուղար)։
Մրցույթի պահանջները հրապարակվում են Հանրային հեռարձակողի խորհրդի կայքում։
Հեռուստաընկերության գործադիր տնօրեն Մարգարիտա Գրիգորյանն աշխատանքից ազատման դիմում է ներկայացրել 2020-ի ապրիլի 20-ին։ Պատճառը ՀՀ վարչապետի տեսաուղերձին նախորդած «կադրից դուրս» հատվածն էր, որը բուռն քննարկման առիթ էր դարձել: Վարչապետի խոսնակ Մանե Գևորգյանը հայտարարել էր, որ կատարծվածի մեղքը Հանրային հեռուստաընկերությանն է: Ի պատասխան ուղիղ միացման խմբի պատասխանատու Վարդան Հակոբյանը հայտարարել էր, որ ինքը զգուշացրել է, որ արդեն ուղիղ եթերում են և կատարվածը ոչ թե իր, այլ վարչապետի աշխատակազմի մեղքն է:
