ՀՀ երկրորդ նախագահ Ռոբերտ Քոչարյանի գույքի և գումարի մի մասի արգելանքը հանվել է։ Դատավոր Աննա Դանիբեկյանը մասնակի բավարարել է պաշտպանների միջնորդությունը և Քոչարյանին պատկանող գույքի մի մասը ազատել կալանքից, գրում է Shantnews.am-ը։
Երևանի ընդհանուր իրավասության դատարանի Շենգավիթի նստավայրում սեպտեմբերի 15-ին շարունակվել է ամբաստանյալներ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի դեմ հարուցված քրեական գործի քննությունը Սահմանադրական կարգը ենթադրաբար տապալելու մեղադրանքով:
Նիստը դռնփակ էր։ Նախորդ նիստինպաշտպանները միջնորդել էին արգելանքից հանել Քոչարյանի անշարժ գույքն ու դրամական միջոցները:
Թեև դատարանը որոշումը պետք է հրապարակեր դռնբաց, սակայն լրագրողներին ներս չեն թողել, հետևաբար առայժմ հայտնի չէ, թե գույքի և դրամական միջոցների որ մասն է հանվել կալանքից:
Մարտի 1-ի գործով տուժողների իրավահաջորդները և նրանց ներկայացուցիչները բոյկոտել են նիստերը և չեն մասնակցում դատաքննությանը:
