Հավաքական անվտանգության պայմանագրի շրջանակում Ռուսաստանի պարտավորությունները չեն տարածվում Լեռնային Ղարաբաղի վրա, հայտարարել է ՌԴ նախագահի խոսնակ Դմիտրի Պեսկովը, փոխանցում է «Ինտերֆաքսը»։
Նա նշել է, որ ՌԴ-ն անվտանգության ապահովման տեսանկյունից պարտավորություններ ունի Հայաստանի նկատմամբ՝ որպես ՀԱՊԿ անդամի։
«Եթե ՀԱՊԿ անդամ երկիրը ենթարկվում է ինչ-որ ագրեսիայի, դրսից հարձակման, ապա այս դեպքում պայմանագրի անդամ երկրները պարտավոր են պաշտպանել այդ պետությանը»,- հայտարարել է Պեսկովը:
Նա նաև հերքել է տեղեկությունը, թե ԼՂ հակամարտությունն անցել է ՀՀ-ի սահման։ Նա նշել է, որ նման տեղեկություն չի հաստատվել։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։
