Հայկական «Գանձասար» (Կապան) ֆուտբոլային ակումբը կմասնակցի «Թուրքմենբաշիի գավաթի» միջազգային 15-րդ մրցաշարին, որը տեղի կունենա փետրվարի 20-28-ը Աշխաբադում: «Գանձասարը», որը ՀՀ առաջնության բրոնզե մրցանակակիր է, հայտնվել է «B» խմբում, որտեղ նրա մրցակիցներն են լինելու տաջիկական «Պարվոզը», Բահրեյնի երիտասարդական հավաքականն ու Թուրքմենիայի չեմպիոն «Աշխաբադը»:

«A» խմբում են Լատվիայի «Սկոնտոն», կիրգիզական «Աբդիշ-Ատան», իրանական «Հեմմաթը» եւ թուրքմենական MTTY-ն:

«Թուրքմենբաշիի գավաթի» հաղթողը գավաթի հետ կստանա 20 հազար դոլար, արծաթե մրցանակակիրը` 10 հազար դոլար, բրոնզե մրցանակակիրը` 5 հազար դոլար:

Նշենք, որ «Թուրքմենբաշիի գավաթի» մրցաշարին պետք է մասնակցեր Աշտարակի «Միկան», որը մասնակցել է այս մրցաշարին երկու անգամ` 2005 եւ 2008 թթ.: Սակայն այս տարի ակումբի ղեկավարությունը որոշել է հրաժարվել մասնակցությունից Հայաստանի առաջնությանը նախապատրաստվելու եւ այդ կապակցությամբ նախատեսված արտերկրյա հավաքներին մասնակցելու նպատակով:

Այդ կապակցությամբ ՀՖՖ որոշել է, որ «Թուրքմենբաշիի գավաթի» մրցաշարին կարող է մասնակցել «Գանձասարը»: «Թուրքմենբաշիի գավաթի» մրցաշարը անց է կացվում արդեն 15-րդ անգամ: 14 տարվա ընթացքում միայն երեք անգամ է գավաթը դուրս եկել երկրի սահմաններից` 1998թ. այն տարավ Իրանի «Իսթեգլալը» Թեհրանից, 2002-ին` վրացական «Տորպեդոն» Քութաիսից, 2006-ին` մոլդավական «Դաչիան» Քիշնեւից: