Հայ դահուկորդներն ավարտեցին իրենց ելույթները Եվրոպայի երիտասարդության ձմեռային 9-րդ օլիմպիական փառատոնում, որը մեկնարկել էր փետրվարի 14-ին լեհական Սլասկ-Բեսկիդի քաղաքում: Լեռնադահուկային մրցումներում Հայաստանը ներկայացնում էին Արսեն Ղազարյանը, Դավիթ Խաչատրյանն ու Տաթեւիկ Մուրադյանը, իսկ դահուկային մրցավազքում` Արամ Գրիգորյանն ու Սերգեյ Միքայելյանը: Ինչպես PanARMENIAN.Net-ին են հաղորդել Հայաստանի լեռնադահուկային սպորտի ֆեդերացիայում, Հայաստանի համար ռեկորդային ցուցանիշ է գրանցել դահուկորդ Սերգեյ Միքայելյանը, որը 80 մասնակիցների թվում գրավել է 23-րդ տեղը 7,5 կմ հեռավորությամբ վազքում (դասական ոճ) եւ 24-րդ տեղը 10 կմ հեռավորությամբ վազքում (ազատ ոճ):

Իր ելույթներն է ավարտել նաեւ գեղասահքի մենասահորդ Սարգիս Հայրապետյանը, որը ընդհանուր ստուգարքում գրավել է 16-րդ տեղը:

Հայաստանի օլիմպիական պատվիրակությունը կվերադառնա փետրվարի 23-ին` Եվրոպայի երիտասարդության ձմեռային 9-րդ օլիմպիական փառատոնի փակման արարողությունից հետո: