ԱՄՆ-ն դիտարկում է եվրոպական մայրցամաքում ռոտացիոն սկզբունքով ամերիկյան ներկայության ապահովման հնարավորությունը։ Այս մասին հայտարարել է ԱՄՆ պետքարտուղարի ռազմաքաղաքական հարցերով օգնական Քլարք Քուփերը՝ Հունաստան, Կիպրոս և Բուլղարիա այցից հետո։
Քուփերը նման հայտարարություն արել է՝ ի պատասխան հարցի՝ արդյոք ԱՄՆ-ն դիտարկում է Թուրքիայում գտնվող «Ինջիրլիքի» ավիաբազային այլընտրանքային որևէ տարբերակ։
Թուրք-ամերիկյան հարաբերությունները շարունակում են սրված մնալ ռազմաքաղաքական ոլորտում․ ԱՄՆ-ն դեմ էր Անկարայի՝ Մոսկվայից Ս-400 հակաօդային պաշտպանության զենիթահրթիռային համալիրներ գնելուն։ Հակառակ պատժամիջոցներ սահմանելու ԱՄՆ սպառնալիքներին՝ Թուրքիան գնեց այդ համակարգերը և պատրաստվում է մոտ ժամանակներս մարտական ծառայության ներգրավվել։
Առհասարակ կողմերը քաղաքական հարցերով սրացումների ժամանակ միմյանց սպառնում են «Ինջիրլիքի» ռազմաբազայով։
«Ինջիրլիքում» է ԱՄՆ ռազմաօդային ուժերի ավիացիոն թևերից մեկը։ Այստեղ են տեղակայվում նաև Հյուսիսատլանտյան դաշինքի երկրների ռազմական ինքնաթիռները և հակաօդային պաշտպանության միջոցները:
