ՌԴ նախագահ Վլադիմիր Պուտինը Անվտանգության խորհրդի մշտական անդամներին է ներկայացրել Մոսկվայում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ եռակողմ հանդիպման արդյունքները։ Նա առաջարկել է քննարկել դրանք։
«Ես կցանկանայի կարճ տեղեկացնել ձեզ ՀՀ և Ադրբեջանի իմ գործընկերների հետ հանդիպման արդյունքների մասին, և նաև մի քիչ խոսել այդ թեմայի շուրջ»,-ասել է Պուտինը, գրում է ՌԻԱ Նսվոստին։
Նա հավելել է, որ զեկույցով հանդես կգա ԱԳՆ ղեկավար Սերգեյ Լավրովը։ Նիստում քննարկվել են նաև ՌԴ ներքին և արտաքին քաղաքականության ակտուալ խնդիրներ։
Հունվարի 11-ին վարչապետ Նիկոլ Փաշինյանը Մոսկվայում Պուտին-Փաշինյան-Ալիև եռակողմ հանդիպման ավարտին հայտարարել է, որ դրա ընթացքում չի հաջողվել լուծել ռազմագերիների հարցը, աշխատանքները շարունակվելու են։
Հանդիպման արդյունքներով ընդունվել է համատեղ հայտարարություն, ըստ որի տարածաշրջանում տնտեսական և տրանսպորտային բոլոր կապերն ապաշրջափակելու նպատակով եռակողմ աշխատանքային խումբ է ստեղծվելու։ Աշխատանքային խումբն առաջին հանդիպումը կանցկացնի մինչև հունվարի 30-ը: Երևանը, Բաքուն ու Մոսկվան մինչև մարտի 1-ը կներկայացնեն ՀՀ ու Ադրբեջանի տարածքով փոխադրումների համար անհրաժեշտ աշխատանքների ժամանակացույցը։ Եռակողմ աշխատանքային խումբը ՀՀ-ից կգլխավորի փոխվարչապետ Մհեր Գրիգորյանը։
