Չնայած նրան, որ մի քանի ժամում դոլարի փոխանակման արժեքը 1 դոլարի դիմաց հասել է 380 դրամի, ալկոհոլային խմիչքներ ներկրող «Ագենա» ընկերությունում պնդում են, որ առաջարկվող ապրանքների գները փոփոխություն չեն կրի: «Մեր ընկերությունն ամեն ինչ կանի, որպեսզի դոլարի փոխարժեքի աճը հանրապետությունում չանդրադառնա մեր սպառողների վրա: Մենք կձեռնարկենք բոլոր անհրաժեշտ միջոցները»,-PanARMENIAN.Net-ի թղթակցին են հաղորդել «Ագենա» ընկերությունում: «Ագենա» ընկերությունը Հայաստան է ներկրում է այնպիսի ալկոհոլային խմիչքներ, ինչպիսիք են «BAILEYS», «JOHNNE WALKER», «DIAGEO», «SMIRNOFF» եւ «SHERIDAN'S»-ը:

Դեռ երեկ դոլարի կուրսը փոխանակման կետերում 305-310 դրամ էր մեկ դոլարի դիմաց, եվրոյի փոխարժեքը 387 դրամ: Դրամի համեմատ դոլարի փոխարժեքի նման արագ աճի հիմնական պատճառը հանդիսացավ Կենտրոնական բանկի ղեկավար Արթուր Ջավադյանի հայտարարությունն, ըստ որի Հայաստանի ԿԲ-ն որոշում է կայացրել արտարժույթի բորսային իր միջամտությունը սահմանափակելու եւ դրամի լողացող փոխարժեքին վերադառնալու մասին: Ընդ որում, ըստ ԿԲ գնահատականների, դոլարի միջին փոխարժեքը 2009 թվականին ակնկալվում է 360-380 դրամի մակարդակի վրա: