Արցախի Հանրապետության Ազգային ժողովը հայտարարություն կընդունի «Ադրբեջանի վերահսկողության տակ հայտնված Արցախի Հանրապետության տարածքների իրավական կարգավիճակի մասին»։
Հայտարարության տեքստի նախագիծը քննարկվել է փետրվարի 23-ին ԱԺ արտաքին հարաբերությունների մշտական հանձնաժողովի նիստում, տեղեկացնում է Արցախի Ազգային ժողովի լրատվության և հանրության հետ կապերի բաժինը:
Նիստի օրակարգը հաստատելուց հետո, որպես նախագծի հեղինակ, հիմնական զեկուցմամբ հանդես է եկել ԱԺ արտաքին հարաբերությունների մշտական հանձնաժողովի պատգամավոր, «Արցախի ժողովրդավարական կուսակցություն » խմբակցության ղեկավար Դավիթ Մելքումյանը՝ ներկայացնելով հայտարարության տեքստը:
Պատգամավորների կողմից առաջարկվել է տեքստում կատարել որոշակի խմբագրում, ինչն ընդունվել է հեղինակի կողմից: Հանձնաժողովը միաձայն դրական եզրակացությամբ կողմ է քվեարկել ներկայացված հայտարարության նախագծին: Այն կքննարկվի առաջիկա լիագումար նիստում:
Նիստին ներկա էին ԱԺ նախագահը, փոխնախագահը և պատգամավորներ: