Նախագահ Արմեն Սարգսյանը Լեռնային Ղարաբաղում տեղակայված ռուսական խաղաղապահ զորախմբի հրամանատար Ռուստամ Մուրադովի հետ քննարկել է ադրբեջանական կողմում պահվող հայ ռազմագերիների և քաղաքացիական անձանց վերադարձին, անհետ կորած անձանց հայտնաբերման և հայկական կողմին հանձնմանն առնչվող հարցեր:
Սարգսյանն անընդունելի է համարել ադրբեջանական կողմից որոնողական աշխատանքների որևէ խոչընդոտում և հրատապ համարել «այս չափազանց զգայուն և կենսական հարցերի լուծումը»:
Փետրվարի 15-ից Արցախի՝ ադրբեջանական կողմին անցած տարածքներում որոնողական աշխատանքներ չեն իրականացվում: Պատճառն ադրբեջանցիների արգելքն է։
Նախագահի աշխատակազմից հայտնում են, որ քննարկման ընթացքում կողմերն անդրադարձել են նաև հայ-ադրբեջանական սահմանի սահմանազատման և սահմանագծման գործընթացներին: Նախագահ Սարգսյանն ընդգծել է Հայաստանի սահմանների պաշտպանությունն ու հատկապես սահմանամերձ համայնքների անվտանգությունն ապահովելու կարևորությունը:
Սարգսյանի ու Մուրադովի հանդիպմանը մասնակցել են նաև Հայաստանում ՌԴ դեսպանության ռազմական կցորդ, գնդապետ Անդրեյ Գրիշչուկը և Արցախի նախագահի հատուկ ներկայացուցիչ Բորիս Ավագյանը:
