Վարչապետ Նիկոլ Փաշինյանի հրավիրած հանրահավաքի մասնակցիները դուրս են եկել երթի Տիգրան Մեծ պողոտայով։
Ընդդիմությունն իր հերթին Ազատության հրապարակից Բաղրամյան պողոտայով երթով շարժվում է դեպի Ազգային ժողով, որի ընդդիմադիր խմբացություններն արտահերթ նիստ են նախաձեռնում։
Հայրենիքի փրկության շարժման համակարգող Իշխան Սաղաթելյանը հայտարարել է, որ կգնան ԱԺ, իրենց պահանջը կհայտնեն և նորից կվերադառնան Ազատության հրապարակ։
Արտահերթ նիստը նախատեսվում է հրավիրել ռազմական դրության չեղարկման պահանջով։
Փետրվարի 25-ին Զինված ուժերի Գլխավոր շտաբը պահանջել է վարչապետի հրաժարականը: Փաշինյանը ԳՇ գործողությունը որակել է ռազմական հեղաշրջման փորձ:
Վարչապետն ավելի վաղ պաշտոնից ազատել է ԳՇ պետ Օնիկ Գասպարյանին և նրա առաջին տեղակալ Տիրան Խաչատրյանին: Զինվորականների հայտարարությունից հետո Փաշինյանն իր կողմնակիցներին կոչ է արել հավաքվել Հանրապետության հրապարակում: Ընդդիմությունն իր հավաքը անցկացնում է Ազատության հրապարակում։