Ընդդիմադիր ակտիվիստ Նարեկ Մալյանին մեղադրանք է առաջադրվել բռնություն գործադրելու հրապարակային կոչերի, բռնությունը հրապարակայնորեն արդարացնելու կամ քարոզելու համար, նրա նկատմամբ որպես խափանման միջոց է ընտրվել ստորագրություն՝ չհեռանալու մասին, PanARMENIAN.Net-ին ասացին Քննչական կոմիտեից:

Մալյանին մեղադրանք է առաջադրվել՝ ՔՕ 226.2-րդ հոդվածի 1-ին մասով (պատժվում են տուգանքով` նվազագույն աշխատավարձի հիսնապատիկից հարյուրհիսնապատիկի չափով, կամ կալանքով` առավելագույնը երկու ամիս ժամկետով, կամ ազատազրկմամբ` առավելագույնը մեկ տարի ժամկետով):

Ավելի վաղ ակտիվիստն ֆեյսբուքյան իր էջում գրել էր, որ ՔԿ-ում իրեն գրավոր բացատրել են, որ «Մահ դավաճանին» կոչը բռնության սպառնալիք է և իրեն հերթական մեղադրանքն են առաջադրել։