ՌԴ ՊՆ փոխնախարար Դմիտրի Բուլգակովը, որը Ստեփանակերտում մասնակցել է ռուս խաղաղապահների համար հերթական մոդուլային զինավանի բացմանը, հայտարարել է, որ մինչև ապրիլի 5-ը բոլոր նախատեսված նման ավանները շահագործման կհանձնվեն և բոլոր խաղաղապահները տեղավորված կլինեն։
Նա հավելել է նաև, որ մինչև ապրիլի ավարտը կսկսի գործել խաղաղապահների համար նախատեսված շարժական հոսպիտալը, տեղեկացնում է ՌԴ ՊՆ-ն։
Ստեփանակերտում բացված հերթական զինավանը նախատեսված է 250 խաղաղապահի համար։
«Այսօրվա դրությամբ մենք ավարտում ենք 25 այդպիսի ավանի կառուցումը։ Ապրիլի 5-ին արդեն բոլորը շահագործման հանձնված կլինեն»,-ասել է գեներալը։
Բլոկ-մոդուլային զինավաններն ինքնավար օբյեկտներ են, հագեցած կենսապահովման բոլոր անհրաժեշտ պայմաններով՝ էլեկտրամատակարարում, ջեռուցում, սանհանգույց, ջրամատակարարում, ջրահեռացում։ Կա նաև կահույք և կենցաղային տեխնիկա՝ էլեկտրական վառարան, սառնարան, լվացքի մեքենա, միկրոալիքային վառարան, հեռուստացույց, օդորակիչ, կաթսա:
Յուրաքանչյուր զինավանի տարածքում կա նաև արհեստական ծածկով մարզասրահ, բաղնիք, բուժկետ, չորանոց, համազգեստի մաքրման սենյակ, ժամանցի սենյակ, գրասենյակ, պահեստ, ճաշարան, ինչպես նաև մթերային պահեստ:
