ՀՀ արտգործնախարար Արա Այվազյանը և Տաջիկստանի ԱԳ նախարար Սիրոջիդին Մուխրիդդինն ԱՊՀ ԱԳ նախարարների խորհրդի նիստի շրջանակում ստորագրել են երկու արտաքին քաղգերատեսչության միջև խորհրդատվությունների երկամյա ծրագիրը:
Նախարարները մտքեր են փոխանակել ինչպես երկկողմ ձևաչափով, այնպես էլ միջազգային կազմակերպությունների շրջանակում գործակցության հարցերի շուրջ: Այդ համատեքստում զրուցակիցներն ընդգծել են հայ-տաջիկական քաղաքական երկխոսության խթանման կարևորությունը, մասնավորապես` բարձր մակարդակով շփումների ակտիվացման և արտաքին քաղաքական գերատեսչությունների միջև պարբերական խորհրդակցությունների անցկացման միջոցով:
Երկկողմ փոխգործակցության փոխշահավետ ուղղությունների շարքում նշվել են առևտրատնտեսական, էներգետիկայի, բժշկության, գիտության և տեղեկատվական տեխնոլոգիաների, զբոսաշրջության, ինչպես նաև մշակութային-հումանիտար ոլորտները:
Հայաստանի և Տաջիկստանի ԱԳ նախարարներն անդրադարձել են նաև տարածաշրջանային և միջազգային անվտանգությանն ու խաղաղությանն առնչվող մի շարք հարցերի, ինչպես նաև ՀԱՊԿ-ում Տաջիկստանի նախագահության առաջնայնությունների իրականացման և կառույցի շրջանակում նախատեսված միջոցառումների նախապատրաստական աշխատանքներին:
