Գործարար, «Բարգավաճ Հայաստան» կուսակցության նախագահ Գագիկ Ծառուկյանի որդու՝ Նվերի հարսանիքի ժամանակ հրավառության փաստի առնչությամբ ոստիկանության Կոտայքի բաժնի ծառայողների կողմից հրավառության կազմակերպչի նկատմամբ կազմվել է վարչական իրավախախտման վերաբերյալ արձանագրություն։

Այս մասին PanARMENIAN.Net-ին հայտնեց ոստիկանության հասարակայնության հետ կապերի բաժնի աշխատակից Զարզանդ Գաբրիելյանը։

«Իրականացվում է վարչական վարույթ։ Այս պահին տուգանքի մասին մենք չենք խոսում», - նշեց նա։

Հարսանիքը կայացել է ապրիլի 10-ին և իր շքեղության պատճառով քննարկման ու քննադատության է արժանացել սոցցանցերում։ Խնդրի առարկա հրավառությունը եղել է թույլատրված ժամից՝ 23։00-ից ուշ ու տևել մոտ կես ժամ։