Երևանում մեկնարկում է ավանդական ջահերով երթը դեպի Հայոց ցեղասպանության զոհերի հիշատակը հավերժացնող Ծիծեռնակաբերդի հուշահամալիր: Երթը կազմակերպել են ՀՅԴ Հայաստանի երիտասարդական միությունը և «Նիկոլ Աղբալյան» ուսանողական միությունը։
Երթը մեկնարկում է Ազատության հրապարակից` Թուրքիայի ու Ադրբեջանի դրոշները վառվելով։ Այն անցնում է «Պայքարը շարունակվում է» կարգախոսով։
«Ջահերով երթը պահանջատիրական երթ է, այն իրականացնողներն ու երթի շարժիչ ուժը երիտասարդներն են, ովքեր պատրաստ են տեր կանգնելու իրենց անժամանցելի իրավունքներին»,- ասվում է ՀՅԴ ՀԵՄ հայտարարության մեջ:
Ջահերով երթի մեկնարկից առաջ մասնակիցներն, ինչպես միշտ, մեկ րոպե լռությամբ հարգել են Հայոց ցեղասպանության զոհերի հիշատակը։ Որպես բողոքի նշան Թուրքիայի ժխտողական քաղաքականության դեմ ակցիայի մասնակիցներն այրել են Թուրքիայի դրոշը։
2020-ին ջահերով երթ չիրականացվեց՝ կորոնավիրուսի համավարակով պայմանավորված։