ՀՀ վարչապետ Նիկոլ Փաշինյանը և ՌԴ նախագահ Վլադիմիր Պուտինը հեռախոսազրույցում քննարկել են իրավիճակը Լեռնային Ղարաբաղի շուրջ։

Հեռախոսազրույցը կայացել է հայկական կողմի նախաձեռնությամբ, տեղեկացնում է Կրեմլի մամուլի ծառայությունը։

«Շարունակվել է Լեռնային Ղարաբաղի շուրջ իրավիճակի քննարկումը։ Գոհունակությամբ նշվել է, որ ռուս խաղաղապահների շնորհիվ իրվիճակը տարածաշրջանում շարունակում է կայուն և հանգիստ մնալ։ Կարծիքներ են փոխանակվել երկկողմ համագործակցության ակտուալ թեմաների շուրջ, այդ թվում՝ էներգետիկ ոլորտում»,- ասվում է հաղորդագրության մեջ, գրում է ՌԻԱ Նովոստին։

Բացի այդ, Փաշինյանը տեղեկացրել է Պուտինին ՀՀ-ում ներքաղաքական վիճակի զարգացումների մասին՝ հունիսին կայանալիք խորհրդարանական արտահերթ ընտրությունների մասով։

ՀՀ վարչապետի մամուլի ծառայությունը հայտնում է, որ զրուցակիցները քննարկել են նոյեմբերի 10-ի եռակողմ հայտարարության կետերի իրականացման ընթացքը՝ կարևորելով 8-րդ կետի լիարժեք կյանքի կոչման անհրաժեշտությունը, որը վերաբերում է ռազմագերիների, պատանդների և պահվող այլ անձանց փոխանակմանը:

Վարչապետ Նիկոլ Փաշինյանը հայտարարել է, որ հունիսի 20-ին երկրում կայանալու են խորհրդարանական արտահերթ ընտրություններ։ Նա ասել է նաև, որ հրաժարական կտա ապրիլի վերջին տասնօրյակում, սակայն կշարունակի կատարել վարչապետի պարտականությունները։