Պեկինից Հայաստան է ուղարկվել կորոնավիրուսի դեմ չինական արտադրության պատվաստանյութը: Այս մասին ֆեյսբուքյան իր էջում տեղեկացրել է Հայաստանում Չինաստանի դեսպան Ֆան Յոնգը:
Պատվաստանյութն ուղարկվել է Չինաստանի կառավարության աջակցությամբ:
«Նախատեսվում է, որ պատվաստանյութերի օգտագործումը դրական ազդեցություն կունենա Հայաստանում համավարակի հաղթահարման վրա։ Բարեկամները ճանաչվում են դժվարին պահերին և համատեղ ուժերով պայքարում համաճարակի դեմ», - ասվում է գրառման մեջ։
Հայաստանում կորոնավիրուսի դեմ պատվաստումները երկու պատվաստանյութերով են իրականացվում` ռուսական «Սպուտնիկ–V»-ով և AstraZeneca-ով։ Նախարարի պաշտոնակատար Անահիտ Ավանեսյանն ավելի վաղ տեղեկացրել էր, որ մյուս շաբաթ ունենալու ենք նաև չինական պատվաստանյութ, որը ևս հասանելի է լինելու 18-ից բարձր տարիքի բոլոր քաղաքացիներին:
