Երուսաղեմում, որը վերջին օրերին հրթիռակոծվել է Գազայի հատվածից, հայերի շրջանում տուժածներ չկան։ Այդ մասին հայտնել են ԱԳՆ-ից, տեղեկացնում է Սպուտնիկ Արմենիան։
Նախարարությունից նշել են նաև, որ մշտական կապի մեջ են Երուսաղեմի Հայոց պատրիարքարանի, ինչպես նաև հայկական համայնքային կառույցների հետ:
«Այս պահի դրությամբ հայերի շրջանում տուժածներ չկան, համայնքային կյանքն ընթանում է բնականոն հունով»,– ասել են գերատեսչությունից:
Երուսաղեմում և Սուրբ Երկրում ստեղծված լարվածության հետևանքով հայ համայնքը ոչ մի վնաս չի կրել, եկեղեցիները չեն տուժել: Այդ մասին ֆեյսբուքյան իր էջում տեղեկացրել է Երուսաղեմի Հայոց պատրիարքարանի դիվանապետ հայր Կորյուն վարդապետ Բաղդասարյանը։
«Այս օրերին կանոնավոր կերպով կատարվել են եկեղեցական բոլոր արարողությունները, կրթական հաստատություններում շարունակվել են դասընթացները»,-ասվում է նրա գրառման մեջ։
Ավելի վաղ ՀԱՄԱՍ շարժման «Ալ Քասամ» բրիգադի մարտական թևը հարյուրավոր հրթիռներ էր արձակել Իսրայելի ուղղությամբ: Շարժման ներկայացուցիչներն ընդգծել էին, որ գնդակոծությունների ակտիվացումը կապված է Պաղեստինի բնակելի շենքերին ուղղված հարվածների հետ: