Մայիսի 14-ին տեղի է ունեցել Հայրենիքի փրկության շարժման խորհրդի նիստ՝ շարժման վարչապետի թեկնածու Վազգեն Մանուկյանի նախաձեռնությամբ, քննարկվել է Սյունիքում ստեղծված իրավիճակը։

Նիստի ընթացքում քննարկվել են նաև երկրին սպառնացող լուրջ վտանգները, ասվում է շարժման ֆեյսբուքյան էջում։

Քննարկման արդյունքների վերաբերյալ խորհուրդը հայտարարություն կտարածի:

Մայիսի 12-ի առավոտյան Ադրբեջանի զինված ուժերը Սյունիքի մարզի Սև լիճ տեղանքում և հարակից տարածքում հատել են ՀՀ պետական սահմանը և խորացել մինչև 3․5 կիլոմետր։ Վարչապետի պաշտոնակատար Նիկոլ Փաշինյանը դա որակել է որպես դիվերսիոն անցում, նշել, որ իրավիճակը մերձճգնաժամային է, եթե ոչ ճգնաժամային, և հայտարարել, որ ՀՀ-ն չի կարող նման վիճակ հանդուրժել։

Մայիսի 13-ին ադրբեջանական զինված ուժերը, կրկին՝ «սահմանների ճշգրտման» հիմնավորմամբ, հերթական սադրանքն են իրականացրել Հայաստանի Հանրապետության ինքնիշխան տարածքի նկատմամբ՝ փորձելով դիրքային առաջխաղացում ապահովել Վարդենիսի և Սիսիանի սահմանային հատվածներում։ Բանակցություններն արդյունք չեն տվել։ՀՀ-ն պաշտոնապես դիմել է ՀԱՊԿ-ին։ Փաշինյանը նաև ռազմական օգնություն է խնդրել ՌԴ-ից։