Վարդենիսի տարածաշրջանում կորել է ժամկետային զինծառայող։ Նա Տավուշի մարզի Կողբ գյուղի բնակիչ է։ Այդ մասին հայտնել է Կողբ համայնքի ղեկավար Արսեն Աղաբաբյանը, տեղեկացնում է «Փաստինֆոն»։
Նա վերջին անգամ ծնողների հետ խոսել է մայիսի 13-ին, 18 տարեկան է, երեք ամսվա զինծառայող:
«Նա ծառայում էր Վարդենիսում: Վերջին անգամ նա ինտերնետ է մտել Վարդենիսի վարչական տարածքից, դրանից ենթադրում ենք, որ Ադրբեջանի տարածք չի անցել ու ինքը Վարդենիսում է։ Վերջին անգամ ծնողների հետ խոսել է մայիսի 13-ին և այլևս նրանից տեղեկություն չունեն: Այս պահին ռազմական ոստիկանությունն է փնտրում, զորամասի հրամկազմն է փնտրում բայց դեռևս նորություն չկա»,-ասել է նա:
Մայիսի 12-ի առավոտյան Ադրբեջանի զինված ուժերը Սյունիքի մարզի Սև լիճ տեղանքում և հարակից տարածքում հատել են ՀՀ պետական սահմանը և խորացել մինչև 3․5 կիլոմետր։ Վարչապետի պաշտոնակատար Նիկոլ Փաշինյանը դա որակել է որպես դիվերսիոն անցում, նշել, որ իրավիճակը մերձճգնաժամային է, եթե ոչ ճգնաժամային, և հայտարարել, որ ՀՀ-ն չի կարող նման վիճակ հանդուրժել։
Մայիսի 13-ին ադրբեջանական զինված ուժերը, կրկին՝ «սահմանների ճշգրտման» հիմնավորմամբ, հերթական սադրանքն են իրականացրել Հայաստանի Հանրապետության ինքնիշխան տարածքի նկատմամբ՝ փորձելով դիրքային առաջխաղացում ապահովել Վարդենիսի և Սիսիանի սահմանային հատվածներում։ Բանակցություններն արդյունք չեն տվել։ՀՀ-ն պաշտոնապես դիմել է ՀԱՊԿ-ին, ինչպես նաև ռազմական աջակցություն խնդրել ՌԴ-ից։