Հայաստանում մտադիր են System of a Down հայտնի ռոք խմբի խմբաքանդակը տեղադրել։ Քանդակագործը Հայկ Թոքմաջյանն է։
Քանդակը դեռ գիպսե տարբերակով է, աշխատանքային փուլում: Քանդակագործի ցանկությունն է, որ վերջնական տարբերակով այն տեղադրվի հայաստանյան այգիներից մեկում՝ տեսանելի բոլորի համար, տեղեկացնում է 1lurer.am-ը։
Թոքմաջյանն ասել է, որ տղաները մշտապես պայքարում են հայ ազգը ներկայացնելու, Հայոց ցեղասպանության դատապարտման ու միջազգային ճանաչման համար:
System of a Down խումբը հիմնադրվել է 1992 թվականին Հարավային Կալիֆորնիայում: Խմբի ներկայիս անդամներն են Դարոն Մալաքյանը, Սերժ Թանկյանը, Շավո Օդաջյանն ու Ջոն Դոլմայանը: Խմբի բոլոր անդամներն ունեն հայկական ծագում: