Երևանի քաղաքապետարանի մամուլի խոսնակ Հակոբ Կարապետյանը ֆեյսբուքյան իր էջում գրել է, որ Երևանի ավագանին անչափ կարևոր, «եթե չասենք` պատմական որոշում է կայացրել»:
Նշվում է, որ ըստ որոշման, Երևան համայնքի սեփականությունը հանդիսացող հողամասում կառուցված ինքնակամ կառույցն այսուհետ կարող է քանդվել Երևանի քաղաքապետի որոշմամբ՝ անկախ կառույցի ավարտվածության աստիճանից և օրինականացման ենթակա լինել կամ չլինելու հանգամանքից:
«Սա ըստ էության մեծապես լուծում է համայնքային հողի զավթումով ապօրինի կառույցների հարցը»,-ասվում է գրառման մեջ:
Երևանի տարբեր վարչական շրջաններում շարունակվում է հանրային շահի անտեսմամբ ապօրինաբար կառուցված շինությունների ապամոնտաժումը՝ մասնավորապես, Դավթաշենում, Աջափնյակում և մյուս վարչական տարածքներում։ Հուլիսի 12-ին Ապօրինի շինություններ են ապամոնտաժվել Դալմայի այգիներում։
