ՀՀ-ն գլխավորում է Եվրոպայի երկրների ցանկը, որտեղ բենզինն ամենաշատն է թանկացել՝ 22․8%-ով:
Picodi.com-ի վերլուծաբանների թիմը հետևել է, թե ինչպես են փոխվել վառելիքի գները 2021-ի առաջին կիսամյակում նախորդ տարվա նույն ժամանակահատվածի համեմատ, գրում է «Գրուզիա Օնլայնը»։
Բենզինի գների ամենամեծ աճը գրանցվել է Տաջիկստանում (30․1%), Հայաստանում (+22․8%), Վրաստանում (+17․4%) և Ուկրաինայում (+13․7%)։
Եվրոպայում և ԱՊՀ երկրներում ամենաէժան բենզինը Ղազախստանում է՝ 1 լիտրի գինն ընդամենը $0․43 է, ՌԴ-ում՝ $0․65, վերջին տեղում Ֆինլանդիան է, որտեղ բենզինի 1 լ արժե $1․9 է։
Վերլուծաբանները նաև հաշվարկել են, թե քանի լիտր բենզին կարող է գնել Եվրոպայի և ԱՊՀ միջին բնակիչը միջին վիճակագրական աշխատավարձով։ Պարզվել է, որ միջին աշխատավարձով ամենաշատ բենզինը կարելի է գնել Գերմանիայում՝ 1786 լ, Շվեդիայում՝ 1771 լ, Ֆինլանդիայում՝ 1589 լ։
Վերջին շրջանում ՀՀ-ում բենզինի 1 լիտրի գինը 480-500 դրամի սահմանում է տատանվում։ Վերջին ամիսներին վառելիքի գներն անընդհատ աճում էին, ինչը հիմնականում պայմանավորված էր միջազգային շուկայում գնաճով ու դոլարի նկատմամբ դրամի արժեզրկամբ: