Օգոստոսի 2-ին մեկնարկում է 8-րդ գումարման Ազգային ժողովի անդրանիկ նիստը։ Այն վարում է տարիքով ամենամեծ պատգամավորը՝ Կնյազ Հասանովը։
Նիստի մեկնարկից առաջ ներկաները մեկ րոպե լռությամբ հարգել են 44-օրյա պատերազմում զոհվածների հիշատակը։
«Հայաստան» խմբակցության անդամները խորհրդարան են եկել Սյունիքի՝ կալանավորված քաղաքապետերի լուսանկարներով շապիկներով։
Օրակարգում 7 հարց է ընդգրկված։
Պատգամավորներն ընտրելու են ԱԺ նախագահին, փոխնախագահներին։ Կստեղծվեն հաշվիչ և մշտական հանձնաժողովներն, կընտրվեն հանձնաժողովների նախագահները։
Կառավարության առաջարկությամբ քննարկման կդրվի կառավարության կառուցվածքի փոփոխության վերաբերյալ օրինագիծը, որի համար նաև կքվեարկեն։
Հունիսի 20-ին կայացած խորհրդարանական արտահերթ ընտրությունների արդյունքում ԱԺ-ում երեք խմբակցություն կլինի՝ «Քաղաքացիական պայմանագիր», «Հայաստան», «Պատիվ ունեմ»։ ՔՊ-ն ունի 71 մանդատ, «Հայաստան» դաշինքը՝ 29-ը, «Պատիվ ունեմ» դաշինքը՝ 7։