Ազգային ժողովը չի ընդունել Արցախի հարցերով մշտական հանձնաժողով ստեղծելու վերաբերյալ «Պատիվ ունեմ» խմբակցության առաջարկը։
«Պատիվ ունեմ» խմբակցության առաջարկին միացել էր նաև «Հայաստան» խմբակցությունը։
Կողմ է քվեարկել 33 պատգամավոր, դեմ՝ 0, ձեռնպահ՝ 68։
«Պատիվ ունեմ» խմբակցության ղեկավար Արթուր Վանեցյանն ԱԺ-ում հարցի քննարկման ժամանակ հայտարարել էր, որ եթե Արցախի հարցերով մշտական հանձնաժողով չստեղծվի, ապա դա կարող է հիմնավոր կասկածներ առաջացնել, որ քաղաքական մեծամասնությունը հրաժարվում է Արցախից։
Վանեցյանը շեշտել էր, որ նման հանձնաժողովի ստեղծումը հստակ քաղաքական ուղերձ կլինի արցախահայությանը, սփյուռքահայությանը, Ադրբեջանին ու Թուրքիային, միջազգային հանրությանը, որ ՀՀ-ն Արցախի մասին չի մոռացել, չի հրաժարվել և չի պատրաստվում հրաժարվել Արցախի խնդիրներով զբաղվելուց։