Արցախում տեղակայված ռուսական խաղաղապահ զորքերի զինծառայողները մոտ 40 լիտր արյուն են հանձնել հիվանդանոցներում բուժվող Արցախի հեռավոր շրջանների բնակիչների համար, որոնք ապրում են բաժանարար գծի հարևանությամբ։
Զինծառայողների կողմից արյան նվիրատվությունը եղել է կամավոր հիմունքներով՝ ի պատասխան տեղի իշխանությունների Ռուսաստանի խաղաղապահ ուժերի մարդասիրական արձագանքման կենտրոնին ուղղված կոչին։
Կոչին մոտ 100 ռուս զինծառայող է արձագանքել, տեղեկացնում է ՌԴ ՊՆ մամուլի ծառայությունը։
Արյան նմուշառումն իրականացվել է Ստեփանակերտի արյան փոխներարկման բաժանմունքում խաղաղապահ ուժերի հատուկ նշանակության բժշկական ստորաբաժանման մասնագետների կողմից։ Բաժանմունքի պետ Գայանե Ավանեսյանն ասել է, որ արյան նմուշառումից հետո այն հետազոտվում է լաբորատորիայում՝ տարբեր վարակների առկայությունը բացառելու նպատակով։