Բրյուսելում կայացած գագաթնաժողովում ԵՄ երկրների ղեկավարները հավանություն են տվել «Արեւելյան գործընկերություն» ծրագրին: Գագաթնաժողովի ընթացքում որոշվել է մասնակից երկրներին` Հայաստանին, Ադրբեջանին, Վրաստանին, Մոլդովային ու Ուկրաինային 600 մլն եվրո հատկացնել մինչեւ 2013թ.: «Գագաթնաժողովում տարբեր կարծքիներ հնչեցին, սակայն մեզ հաջողվեց համաձայնության գալ եւ սա հաղթանակ է ոչ միայն մասնակից երկրների, այլ նաեւ, մասնավորապես, ԵՄ-ի համար»-հայտարարել է ԵՄ-ում նախագահող Չեխիայի ԱԳՆ ղեկավար Կարել Շվարցենբերգը:

Ինչ վերաբերում է նրան, թե կհրավիրվի մասնակցելու ծրագրի վերաբերյալ Պրահայում մայիսի 7-ին կայանալիք ԵՄ գագաթնաժողովին նաեւ Բելառուսի նախագահ Ա.Լուկաշենկոն, Կարել Շվարցենբերգը նշել է, որ ամեն ինչ կախված է Լուկաշենկոյի վարքագծից, հաղորդում է EU bizness-ը:

Գագաթնաժողովի ընթացքում Ֆրանսիան անհամաձայնություն է հայտնել ծրագրի վերաբերյալ, սակայն Լեհաստանը եւ ծրագրի ֆինանսավորման մյուս կողմնակիցները կոչ են արել իրենց գործընկերներին հավանություն տալ 600 մլն դոլարի հատկացումներին: «Վրաստանում օգոստոսյան իրադարձությունների եւ գազային ճգնաժամի ժամանակ մենք տեսանք, թե որքան փխրուն է այս երկրների տարածաշրջանը` 600 մլն եվրոն նվազագույն գումարն է, որ կարող է կայունացնել տարածաշրջանը»,-հայտարարել է Լեհաստանի ԱԳՆ ղեկավար Ռադոսլավ Սիկորսկին: