ՀՀ կառավարությունն անում է հնարավորը, որպեսզի իրանցի վարորդների կողմից բեռնափոխադրումները Հայաստանի տարածքով իրականացվեն հարմարավետ ու առանց հավելյալ խնդիրների։ Այդ մասին հայտարարել է ՊԵԿ նախագահ Ռուստամ Բադասյանը։
«Ունենք փաստացի ստեղծված իրավիճակ ՀՀ տարածքում։ Այդ իրավիճակից բխող գործողություններ կառավարությունը ձեռնարկել և ձեռնարկում է»,– ասել է Բադասյանը, գրում է Sputnik Արմենիան։
ՊԵԿ նախագահը նաև հայտարարել է, որ ի պատասխան Գորիս–Կապան ճանապարհին Ադրբեջանի տեղադրած մաքսակետի՝ Հայաստանը մաքսակետ տեղադրելու կարիք չունի։
«Մենք մեր գործառույթներն իրականացնում ենք բավարար ենթակառուցվածքների միջոցով։ Այսինքն` մենք կարիք չունենք որևէ տեղ հավելյալ մաքսակետ տեղադրելու»,– ասել է նա։
Սեպտեմբերի 11-ից Գորիս-Կապան ճանապարհի որոշ հատվածներում տեղակայված ադրբեջանցի ոստիկանները կանգնեցնում են իրանական բեռնատարների վարորդներին և գումար պահանջում ուղևորության համար: 2 վարորդ էլ ձերբակալվել է։
