11 հոկտեմբերի 2021 - 12:26 AMT
Երևանի 40 շենք արդեն օգտվում է արևային էներգիայից

«ԵՄ-ն Երևանի համար. Արևային համայնք» ծրագրի առաջին փուլում ներառված մայրաքաղաքի 43 բազմաբնակարան շենքերից 40-ում արդեն իսկ տեղադրվել են արևային ֆոտովոլտային կայաններ։

Նաև անցկացվել են արտաքին և ներքին լուսավորության նոր համակարգեր, տեղադրվել լուսադիոդային լամպեր, տեղեկացնում է Երևանի քաղաքապետարանը։

Ծրագիրը ներառում է 90 շենք:

Հայաստանում Եվրոպական Միության պատվիրակության և «Քաղաքապետերի դաշնագիր՝ հանուն կլիմայի և էներգիայի» նախաձեռնության աջակցող խմբի ներկայացուցիչներն այցելել են շենքեր և ծանոթացել կատարված աշխատանքներին, համակարգի արդյունավետությանն ու էներգախնայողության ցուցանիշներին: Նշվել է, որ մյուս շենքերում աշխատանքներն ընթացքի մեջ են: