Կորոնավիրուսից ևս մեկ ծննդկան է մահացել: Այդ մասին ֆեյսբուքյան իր էջում տեղեկացրել է առողջապահության նախարար Անահիտ Ավանեսյանը։
Նա նշել է, որ Covid-19-ի դեմ պատվաստանյութերն անվտանգ են հղիություն պլանավորողների և հղիների համար։ Նախարարը հավելել է, որ կորոնավիրուսի դեմ պատվաստանյութերը պաշտպանում են հղիներին։
«Ցավոք, Covid-19-ից ևս մեկ ծննդկան է մահացել: Եվ չնայած մեր մասնագետների գործադրած հսկայական ջանքերին, չհաջողվեց փրկել երիտասարդ կնոջ կյանքը»,-գրել է նա:
Առողջապահության նախարարությունը ներկայացրել է Covid-19-ի դեմ պատվաստումների բացարձակ և ժամանակավոր բժշկական հակացուցումները, որտեղ նշվում է, որ հղիությունը պատվաստման հակացուցում չէ. հղիները ներառվել են կորոնավիրուսային հիվանդության դեմ պատվաստումների ռիսկի խմբերում: Խորհուրդ չի տրվում հետաձգել հղիության պլանավորումը կամ էլ պատվաստման պատճառով ընդհատել հղիությունը: Եթե հղին պատվաստվել է առանց տեղեկացված լինելու հղիության մասին, ապա պատվաստումն անվտանգ է մոր և պտղի առողջության համար և հղիությունն ընդհատելու ցուցում չէ: