ԱԽ քարտուղար Արմեն Գրիգորյանը, Հանրայինի եթերում անդրադառնալով ապաշրջափակման հարցին, ասել է, որ եթե ադրբեջանցիները միայն Նախիջևան են ուզում գնալ, ապա արդյունավետ կարող է լինել Խնձորեսկ-Բիչենեկ ճանապարհը։

Նա նշել է, որ քաղաքական որոշում է պետք՝ հստակեցնելու համար, թե որ ճանապարհները կամ որ մուտքերն ենք օգտագործելու ապաշրջափակման համար՝ որպեսզի Ադրբեջանի տարածքով կապվենք Ռուսաստանի կամ այլ երկրի հետ, իսկ Ադրբեջանն օգտագործի մեր տարածքը:

«Եթե հստակ է, որ նրանք միայն Նախիջևան են ուզում գնալ, ապա արդյունավետ ճանապարհ կարող է լինի Խնձորեսկից Բիչենեկ տանողը, ադրբեջանցիները կարող են օգտագործել այդ ճանապարհը։ Մենք էլ նույնպես Խնձորեսկից դուրս գանք, շարժվենք դեպի Հորադիզ, Հորադիզից՝ դեպի որ կողմ ցանկանանք», - ասել է Գրիգորյանը։

Ըստ Գրիգորյանի, քանի որ կա այլընտրանաքային ճանապարհ, Գորիս-Կապան ավտոճանապարհն օգտագործելու տրամաբանություն չկա։ Նա նշել է, որ եթե նման անհրաժեշտություն առաջանա, «ադրբեջանական կողմը Հայաստանին կիրազեկի, թե ինչ գործընթաց պետք է տեղի ունենա այդ դեպքում»:

Նա հավելել է, որ այդ հարցերը հիմա քննարկվում են։

Արմեն Գրիգորյանը, անդրադառնալով այն դիտարկմանը, նաև ասել է, թե իշխանությունը չի պայմանավորվել Ադրբեջանի հետ, որ Գորիս-Կապան ճանապարհը թեկուզ որոշ ժամանակահատվածում մնա ՀՀ վերահսկողության տակ, ասել է, որ նման պայմանավորվածություն եղել է։ «Պայմանավորվածություն եղել է այն տրամաբանությամբ, որ մինչև այլընտրանքային ճանապարհի կառուցումը, կարողանանք օգտվել այդ ճանապարհից», - ասել է նա։

Ավելի վաղ ՀՀ ԱԽՔ Արմեն Գրիգորյանը Հանրային հեռուստաընկերության եթերում հայտարարել էր, որ Գորիս–Կապան ճանապարհին Ադրբեջանը նոյեմբերի լույս 11-ի գիշերը մաքսակետեր կտեղադրի։

Նոյեմբերի 11-ին կառավարության նիստից հետո Արմեն Գրիգորյանը հայտարարել էր, որ Գորիս–Կապան ճանապարհի դիմաց Ադրբեջանը միջանցք է պահանջել դեպի Նախիջևան։ Նա նաև նշել է, որ միջանցքային տրամաբանությամբ որևէ գործարք չի լինելու։