Արցախի պաշտպանության նախարարությունը հերքել է ադրբեջանական լրատվամիջոցներով տարածվող տեղեկությունները, ըստ որոնց, իբր, ՊԲ ստորաբաժանումներն ավտոմեքենայից կրակ են բացել ադրբեջանական դիրքերի ուղղությամբ՝ որակելով դրանք որպես հերթական ապատեղեկատվություն, որը չի համապատասխանում իրականությանը:
Նշվում է, որ իրականում Արցախի Մարտունու շրջանի Կարմիր Շուկա բնակավայրի հարակից դիրքերից ադրբեջանցի զինծառայողներն անկանոն կրակ են բացել գյուղի ուղղությամբ, ինչի հետևանքով հրդեհվել է մանկապարտեզի հարակից տարածքում կայանված քաղաքացիական անձին պատկանող մեքենան:
Միջադեպի առնչությամբ համապատասխան տեղեկատվություն է տրամադրվել ռուսական խաղաղապահ զորակազմի հրամանատարությանը և ձեռնարկվել են միջոցներ՝ ադրբեջանական կողմին հրադադարի պահպանման ռեժիմին վերադարձնելու ուղղությամբ: