Մոսկվայի դատարանը որոշել է կալանավորել ԱՄՆ քաղաքացի Անդրե Խաչատուրյանին, որին ռուս իրավապահները ձերբակալել էին Մոսկվայի «Շերեմետևո» օդանավակայանի տրանզիտ գոտում Glok-17 մարտական ատրճանակ և փամփուշտներ ունենալու համար։ Այդ մասին հայտնել է Մոսկվային Հանրային դիտորդական հանձնաժողովի անդամ Կոնստանտին Կիմը։

Խաչատուրյանն իր մեղքը չի ընդունում՝ նշելով, որ զենք կրելու ամերիկյան թույլտվություն ունի և նախկինում պահնորդական ընկերության աշխատակից է եղել, գրում է ՏԱՍՍ-ը։

ԱՄՆ քաղաքացի Անդրե Խաչատուրյանը ձերբակալվել էր 2021թ․ դեկտեմբերի 26-ին «Շերեմետևոյում»։ Նրա մոտից առգրավվել է Glok-17 ատրճանակն ու փամփուշտները։

Նրան մեղադրանք է առաջադրվել ՌԴ սահմանով զենք ու զինամթերք ապօրինի անցկացնելու համար։ Որպես խափանման միջոց է ընտրվել կալանքը, այժմ նա պահվում է Մոսկվայի №7 մեկուսարանում։

Նշվում է, որ ԱՄՆ քաղաքացին հաղորդակցվելու խնդիրներ ունի մեկուսարանի աշխատակիցների և նույն բանտախցում պահվողների հետ, քանի որ տիրապետում է միայն հայերեն և անգլերեն լեզուներին։