31 մարտի 2009 - 21:17 AMT
ԼՂՀ ԱԳՆ անհանգստացած է հրադադարի ռեժիմի` հաճախակի դարձած խախտումներով
ԼՂՀ ԱԳՆ ղեկավար Գեորգի Պետրոսյանը նամակ է հղել ԵԱՀԿ գործող նախագահ Դորա Բակոյանիսին, որում մտահոգություն է արտահայտում ադրբեջանական կողմից հրադադարի ռեժիմի հաճախակի դարձած խախտումների վերաբերյալ, հատկապես ԵԱՀԿ ՄԽ համանախագահների` տարածաշրջանային դիտարկումների կամ այցելությունների ժամանակահատվածում: Այդ մասին PanARMENIAN.Net-ի թղթակցին հայտնել են ԼՂՀ ԱԳՆ մամլո ծառայությունում։

Փետրվարի 26-ին Լեռնային Ղարաբաղի եւ Ադրբեջանի զինված ուժերի շփման գծի դիտարկման ժամանակ, չնայած տեղական հրամանատարների կողմից տրված անվտանգության երաշխիքներին, դիտարկման կետի անմիջապես մոտակայքում հնչել են կրակոցներ, ինչի արդյունքում ձախողվել է ԵԱՀԿ դիտարկումը:

Նամակում նշվում է նաեւ տվյալ միջադեպի հետաքննության արդյունքների մասին գրավոր տեղեկատվություն տրամադրելու անհրաժեշտությունը: ԼՂՀ ԱԳՆ-ում համոզված են, որ նմանատիպ խախտումների իրական մեղավորների մասին ճշմարիտ ու ժամանակին տեղեկատվության տրամադրումը հակամարտության բոլոր կողմերին դրական կերպով կանդրադառնա ԵԱՀԿ գործող նախագահի անձնական ներկայացուցչի արդյունավետ աշխատանքի վրա: