Վարչապետ Նիկոլ Փաշինյանը, կառավարության նիստում անդրադառնալով ապրիլին Մոսկվա կատարելիք այցին, ասել է, թե պետք է ամեն ինչ անել, որ այցը Ռուսաստան անցնի բարձր մակարդակով ու հարուստ բովանդակությամբ։
«Հիմա այդ այցի նախապատրաստական փուլում ենք։ Պետք է ամեն ինչ անել, որ այդ ընթանա»,- ասել է նա:
Անդրադառնալով Ֆրանսիա կատարած աշխատանքային այցին՝ Փաշինյանը այն հաջող է անվանել և ասել է, որ պետք է աշխատել դրա օրակարգի իրականացման ուղղությամբ։
Նա հավելել է, որ Փարիզում կայացած հայ-ֆրանսիական համաժողովը պետք է օգտագործել նոր լիցք հաղորդելու համար Ֆրանսիայի և Հայաստանի համագործակցությանը, տնտեսական կապերի ակտիվացմանը։
Ֆրանսիայի նախագահ Էմանուել Մակրոնը Ելիսեյան պալատում վարչապետ Նիկոլ Փաշինյանի հետ հանդիպմանն ընդգծել է բարեկամ Հայաստանի հետ տնտեսական և հումանիտար ոլորտներում կապերը խորացնելու Ֆրանսիայի պատրաստակամությունն ու հետաքրքրվածությունը:
Վարչապետ Նիկոլ Փաշինյանը և Ֆրանսիայի նախագահ Էմանուել Մակրոնը Փարիզում` կառավարության նախարարական համաժողովների կենտրոնում մասնակցել են «Հավակնություններ` Հայաստան-Ֆրանսիա» խորագրով համաժողովի ամփոփիչ պլենար նիստին: Համաժողովին մասնակցել են Հայաստանի և Ֆրանսիայի կառավարությունների, տեղական ինքնակառավարման մարմինների, տեղի հայ համայնքի մի շարք ներկայացուցիչներ, Ֆրանսիայի գործարար համայնքի ներկայացուցիչներ:
