Նախատեսվում է 2022 թվականի բյուջեի եկամտային մասով ընթացիկ նպատակային հատկացումները՝ սուբվենցիաներն ավելացնել 22,330,000 դրամով, և դրանք ուղղել պատերազմի հետևանքով ժամանակավորապես ՀՀ-ում գտնվող քաղաքացիներին մշտական բնակության վայր տեղափոխման նախագծի իրականացմանը։ Որոշումն ընդունվել է Երևանի ավագանու ապրիլի 19-ի նիստում, գրում է «Առավոտը»։

Ավագանու անդամ Էռնեստ Ավանեսովը հետաքրքրվել է՝ արդյոք ընդհանարապես նախատեսվո՞ւմ է առաջին պատերազմի ժամանակ, դրանից առաջ և հետո ՀՀ տեղափոխված, Ադրբեջանից բռնագաղթված հայ ընտանիքներին բնակարաններով ապահովելու համար ծրագիր կամ գումար։

Հարցը զեկուցող քաղաքապետի առաջին տեղակալ Լևոն Հովհաննիսյանն ի պատասխան ասաց, որ ղարաբաղյան առաջին պատերազմի ժամանակ Ադրբեջանից տեղահանված քաղաքացիների բնակարանային խնդիրների լուծման համար Երեւանի 2022 թվականի բյուջեով միջոցներ նախատեսված չեն: