Ռուսաստանը գնահատում է Երևանի հավասարակշիռ դիրքորոշումն Ուկրաինայի հարցում։ Այդ մասին հայտարարել է ՌԴ ԱԳՆ ԱՊՀ երկրների չորրորդ դեպարտամենտի տնօրեն Դենիս Գոնչարը։
Նա հավելել է, որ Ռուսաստանում լավ գիտեն ՀՀ ղեկավարության հանդեպ օտարերկրյա տերությունների գործադրած ճնշման մասին։
Նա նմանատիպ գնահատական է տվել նաև Ադրբեջանի դիրքորոշմանը։
«Մենք գնահատում ենք մեր հայ և ադրբեջանցի գործընկերների դիրքորոշումը Ուկրաինայում իրավիճակի վերաբերյալ՝ Արևմուտքում հակառուսական աննախադեպ արշավի պայմաններում։ Մենք լավ իրազեկված ենք օտարերկրյա տերությունների այն ճնշման մասին, որին բախվում են ՀՀ և Ադրբեջանի ղեկավարությունները։ Մենք գնահատում ենք այն փաստը, որ արտաքին քաղաքականությունը կառուցելիս Երևանն ու Բաքուն ղեկավարվում են առաջին հերթին իրենց ազգային շահերով»,-ասել է Գոնչարը։
Հայաստանը չեզոք դիրքորոշում է որդեգրել ՌԴ և Ուկրաինայի միջև հակամարտության հարցում։
