Ոստիկանությունը թույլ չի տվել ընդդիմության բողոքի ավտոերթի մասնակիցներին մտնել Հանրապետության հրապարակ։ Նրանք չեն կարողացել հրապարակ հասնել ինչպես Վազգեն Սարգսյան փողոցով, այնպես էլ Ամիրյանով։
Ոստիկանությունը պարեկային ավտոմեքենաներով արգելափակել է դեպի հրապարակ տանող ճանապարհները` Շահումյան հրապարակ–Վազգեն Սարգսյան խաչմերուկը և Ամիրյան–Զաքյան խաչմերուկը, տեղեկացնում է Sputnik Արմենիան։
Ավտոերթի առաջ փակվել է նաև Աբովյան–Արամի խաչմերուկը։
Ընդդիմությունը ժամը 12։00-ից Երևանում ավտոերթեր է անցկացնում 4 տարբեր ուղղություններով։ Տրանսպորտային միջոցներին ամրացված են Հայաստանի և Արցախի դրոշները։ 16:00-ին Ֆրանսիայի հրապարակում հանրահավաք է նախատեսված։
Հայաստանում բողոքի նոր ալիքը բարձրացել է ՀՀ վարչապետ Նիկոլ Փաշինյանի Արցախի վերաբերյալ հայտարարությունից հետո, ըստ որի միջազգային հանրությունն ակնկալում է հայկական կողմից, որ «իջեցնի նշաձողը» ԼՂ կարգավիճակի հարցում։