Մայիսի 17-ի վաղ առավոտից «Դիմադրություն» շարժումը վերսկսել է անհնազանդության ակցիաները վարչապետ Նիկոլ Փաշինյանի հրաժարականի պահանջով։ Երևանում անհնազանդության ակցիաներ են իրականացվում, քաղաքացիները փակում են փողոցներ Երևանի կենտրոնում և վարչական տարբեր տարածքներում։
Ցուցարարները փակել են Մաշտոցի պողոտայից դեպի օդանավակայան տանող ճանապարհը։ Ոստիկանությունը փորձում է վերականգնել երթևեկությունը, կան բերման ենթարկվածներ, տեղեկացնում է Aysor.am-ը։
Լարված է եղել նաև Իսահակյանի փողոցում։ Երբ կարմիր բերետավորները բերման են ենթարկել ակցիայի մասնակից տղամարդկանց, փողոցը կրկին փակել են տեղում մնացած կանայք, հայտնում է «Փաստինֆոն»։
Ոստիկանները բերման են ենթարկել 155 քաղաքացու, ասել են ոստիկանությունից։
Քաղաքացիները բերման են ենթարկվել Վարչական իրավախախտումների վերաբերյալ օրենսգրքի 182-րդ հոդվածի՝ ոստիկանների օրինական պահանջը չկատարելու հիմքով։ Բերման ենթարկվածների թվում են նաև ՀՀ երկրորդ նախագահ Ռոբերտ Քոչարյանի կրտսեր որդին՝ Լևոնը, ՀՀԿ փոխնախագահ Արմեն Աշոտյանը, «Հայրենիք» կուսակցության անդամներ և այլոք։