Ադրբեջանի նախագահ Իլհամ Ալիևը հայտարարել է, որ մայիսի 24-ին տեղի ունեցած Ադրբեջանի և Հայաստանի միջև պետական սահմանի սահմանազատման հանձնաժողովի առաջին նիստը շատ կարևոր էր, քանի որ սահմանազատումը «ինքնաբերաբար վերջ կդնի Ադրբեջանի հանդեպ տարածքային պահանջներին ՀՀ-ում ռևանշիստական ուժերի կողմից»:

«Եթե մենք որոշում ենք սահմանները, ապա Լեռնային Ղարաբաղի ի՞նչ կարգավիճակի մասին կարող է խոսք լինել»,- ասել է Ալիևը Կովսական (Զանգելան) կատարած իր այցի ժամանակ։

Ալիևն ասել է նաև, թե «Լեռնային Ղարաբաղի հակամարտությունը հանգուցալուծված է, Մինսկի խումբն ավարտել է իր գործունեությունը», գրում է Haqqin.az-ը։

«Կա Ղարաբաղյան գոտի, որն Ադրբեջանի տարածք է և բոլորը դա ընդունում են»,- նշել է նա։

Մայիսի 24-ին Հայաստանի և Ադրբեջանի միջպետական սահմանին տեղի է ունեցել ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի առաջին հանդիպումը` Հայաստանի և Ադրբեջանի միջև սահմանազատման և սահմանային անվտանգության հարցերով հանձնաժողովների համատեղ աշխատանքի ձևաչափով։

Եվրոպական խորհրդի նախագահ Շառլ Միշելը ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ Բրյուսելում կայացած եռակողմ հանդիպման վերաբերյալ հայտարարության մեջ նշել էր, որ կողմերը պայմանավորվել են, որ առաջիկա օրերին միջպետական սահմանին տեղի կունենա սահմանազատման հանձնաժողովների առաջին համատեղ նիստը։ «Քննարկվելու են սահմանազատման հետ կապված բոլոր հացերն ու այն, ինչպես կարելի է լավագույնս կայունություն ապահովել»,-ասվում է հայտարարության մեջ։ .