Միջուկային զենքի կիրառման ռիսկը սառը պատերազմից ի վեր հասել է բարձրակետին՝ դա կապված է այն հանգամանքի հետ, որ «միջուկային ակումբի» երկրները սկսում են ակտիվորեն մեծացնել իրենց զինանոցները։ Այդ մասին ասվում է Ստոկհոլմի Խաղաղության հետազոտությունների միջազգային ինստիտուտի (SIPRI) զեկույցում, տեղեկացնում է ՏԱՍՍ-ը։
Դրանում նշվում է՝ հստակ ազդակներ կան, որ միջուկային զենքի կրճատման գործընթացն ավարտված է, և միջուկային ակումբի բոլոր ուժերը» (Ռուսաստան, ԱՄՆ, Մեծ Բրիտանիա, Ֆրանսիա, Չինաստան, Հնդկաստան, Պակիստան, Իսրայել և այլն) ավելացնում են մարտագլխիկների քանակը և իրականացնում միջուկային զինանոցների արդիականացում։
Ըստ հեղինակների, միջազգային լարվածության աճին նպաստում է նաև այն փաստը, որ այդ երկրների մեծ մասը «ուժեղացնում է միջուկային հռետորաբանությունը», իսկ «միջուկային զենքի դերն իրենց պաշտպանական ռազմավարություններում գնալով ավելի նշանակալի է դառնում»։
