«Քաղաքացիական պայմանագիր» խմբակցությունը ՀՀ գլխավոր դատախազի պաշտոնում առաջադրել է Աննա Վարդապետյանի թեկնածությունը։ Այդ մասին ֆեյսբուքյան իր էջում հայտնել է ՔՊ խմբակցության քարտուղար Արթուր Հովհաննիսյանը:
Վարդապետյանը վարչապետ Նիկոլ Փաշինյանի օգնականն է։
Ավելի վաղ այդ լուրը հաստատել էր ՔՊ խմբակցության ղեկավար Հայկ Կոնջորյանը՝ նշելով, որ Վարդապետյանն ընտրվելուց հետո կատարելու է ՀՀ սահմանադրությամբ և օրենքներով իրեն լիազորված գործողություններն ու լինելու է Սահմանադրության, օրենսդրության և իր խղճի առջև մաքուր ու պատասխանատու:
Սեպտեմբերի 16-ին լրանում է ՀՀ գլխավոր դատախազ Արթուր Դավթյանի պաշտոնավարման ժամկետը: Գլխավոր դատախազն Ազգային ժողովի իրավասու մշտական հանձնաժողովի առաջարկությամբ ընտրվում է Ազգային ժողովի կողմից` պատգամավորների ընդհանուր թվի ձայների առնվազն երեք հինգերորդով՝ վեց տարի ժամկետով։
