Ամենայն հայոց կաթողիկոսը Գարեգին Երկրորդը և Արցախի պետնախարար Արտակ Բեգլարյանը Մայր աթոռում քննարկել են ներկա պայմաններում արցախահայության առջև ծառացած մարտահրավերները և 44-օրյա պատերազմի հետևանքների հաղթահարմանն ուղղված քայլերը։
Հանդիպմանը մասնակցել է նաև ԱՀ ՄԻՊ Գեղամ Ստեփանյանը՝ Արցախի թեմի առաջնորդ տեր Վրթանես եպիսկոպոս Աբրահամյանի ուղեկցությամբ, հայտնում է Մայր աթոռի տեղեկատվական համակարգը։
Կարևորվել է նաև համազգային ներուժի և ջանքերի մեկտեղումը՝ ի զորակցություն Արցախի ժողովրդի։
Զրույցի ընթացքում անդրադարձ է կատարվել նաև Արցախի պատմամշակութային և հոգևոր ժառանգության պահպանության հարցերին, Արցախ–Սփյուռք կապերին։ Վեհափառ Հայրապետն իր գնահատանքն է բերել Արցախի իշխանություններին եկեղեցու նկատմամաբ դրսևորած հոգատար վերաբերմունքի համար։
Հանդիպման ավարտին Բեգլարյանը շնորհակալություն է հայտնել Նորին Սրբությանը պատերազմի ընթացքում և հետպատերազմյան շրջանում Մայր Աթոռի և նրա աշխարհասփյուռ թեմերի՝ Արցախին բերած զորակցության համար։