‌Ադրբեջանցիների կողմից գերեվարված շիրակցի պահեստազորայինների հարազատները Երևանում ՌԴ դեսպանատան շենքի դիմաց ակցիա են իրականացրել։

Նրանք պահանջել են քայլեր ձեռնարկել իրենց զավակներին վերադարձնելու ուղղությամբ, գրում է «Փաստինֆոն»։

Գերիների հարազատները հայտարարել են, որ, եթե իրենց որդիներին ռուս խաղաղապահների մոտից են տարել, ուրեմն՝ պետք է գան և այդտեղից պահանջեն։

Հունիսի 28-ին գերեվարված շիրակցիների ծնողները ակցիա են իրականացրել Գյումրիում ՌԴ հյուպատոսարանի շենքի մոտ։ 5 ծնող մտել է շենք ու հանդիպել ՌԴ հյուպատոս Ռուսլան Կանդաուրովի հետ։ Վերջինս խոստացել է ծնողների պահանջը փոխանցել Հայաստանում ՌԴ դեսպան Սերգեյ Կոպիրկինին:

Վարչապետ Նիկոլ Փաշինյանը հունիսի 27-ի առցանց ասուլիսում ասել է, որ Ադրբեջանում պահվող գերիների 90 տոկոսը գերեվարվել է ռուս խաղաղապահների տեղակայումից հետո և նրանց պատասխանատվության գոտում։ Անդրադառնալով կոնկրետ շիրակցի գերիներին՝ Փաշինյանն ասել է, որ նոյեմբերի 9-ի հայտարարությամբ Խծաբերդն ու Հին Թաղերը հանձնված չեն եղել, և պետք է լինեին ռուս խաղաղապահների վերահսկողության տակ։_ Նա նաև ասել է, որ Բաքուն փորձում է վարկաբեկել ռուս խաղաղապահներին, ու այդ պատճառով դիտմամբ չի վերադարձնում գերիներին։ ‌