Վրաստանի ԱԳ նախարար Իլյա Դարչիաշվիլին, անդրադառնալով ՀՀ և Ադրբեջանի ԱԳ նախարարների հանդիպմանը Վրաստանում, ասել է` հպարտ է, որ հանդիպումն անցնում է Թբիլիսիում։
«Ես շատ հպարտ եմ, որ Ադրբեջանի և Հայաստանի ԱԳ նախարարներ Ջեյհուն Բայրամովի և Արարատ Միրզոյանի հանդիպման վայրը Թբիլիսին է։ Վստահ եղեք, որ տարածաշրջանում խաղաղության և կայունության հաստատման մեր համատեղ ջանքերն արդյունք կբերեն»,-գրել է Դարչիաշվիլին սոցցանցում, տեղեկացնում է Sputnik Georgia-ն։
Թբիլիսիում անցնում է Միրզոյանի և Բայրամովի առաջին երկկողմ հանդիպումը։ Մինչ այդ կողմերը հանդիպել են Դուշանբեում ՌԴ ԱԳ նախարարի հետ եռակողմ հանդիպման շրջանակում։
ԱԳ նախարար Արարատ Միրզոյանը Թբիլիսի աշխատանքային այցի շրջանակում հանդիպում է ունեցել Վրաստանի վարչապետ Իրակլի Ղարիբաշվիլիի հետ: Միրզոյանը երախտագիտություն է հայտնել վրացական կողմին Հայաստանի ու Ադրբեջանի ԱԳ նախարարների հանդիպումը հյուրընկալելու և տարածաշրջանում խաղաղությանն ու կայունությանը նպաստելու պատրաստակամության համար։ Մտքեր են փոխանակվել Հայաստանի և Ադրբեջանի միջև հարաբերությունների կարգավորման վերաբերյալ:
