ԱԺ արտաքին հարաբերությունների հանձնաժողովի նախագահ Էդուարդ Աղաջանյանն Անկարայի հայտարարությունը նախապայման չի համարում:
«Կարծում եմ` Ձեր նշած հայտարարությունը, այնուամենայնիվ, նախապայման չէր: Թուրքիան, ըստ էության, մշտապես այս դիրքորոշմամբ է հանդես եկել, որը, բնականաբար, մեզ համար երբևէ ընդունելի չի եղել», - ասել է Աղաջանյանը՝ անդրադառնալով Թուրքիայի ԱԳ նախարար Մևլյութ Չավուշօղլուի հայտարարությանը, տեղեկացնում է «Ազատությունը»։
Չավուշօղլուն շեշտել է հայ-թուրքական գործընթացում Ադրբեջանի կարևորությունը՝ ընդգծելով, որ թեև այս գործընթացը երկկողմ մակարդակով է ընթանում, սակայն դա իրականում եռակողմ գործընթաց է, քանի որ իրենք ամեն ինչ Ադրբեջանի հետ համակարգում են:
«Դա իրողություն է՝ անկախ նրանից թե հայաստանցիների դուրը գալիս է, թե՝ ոչ. մենք մի ժողովուրդ 2 պետություն ենք», ասել է նա։
Արտաքին հարաբերությունների հանձնաժողովի նախագահը շեշտել է, որ Հայաստանի դիրքորոշումը չի փոխվել։
«Հայկական կողմը մշտապես արձանագրել է, որ կա նման խնդիր, արձանագրել է, որ Թուրքիայի, հաճախ թուրքական հայտարարությունների և գործողությունների մեջ, ցավոք, կա բաժանում, և իհարկե, մեր խնդիրներից է այդ թվում ամեն ինչ անել, որպեսզի այդ տարանջատումը չլինի կամ առնվազն լինի նվազագույնը: Այո, ես արձանագրում եմ, որ հայկական կողմի դիրքորոշումը չի փոխվել, և որևէ նախապայման այս գործընթացում անընդունելի է»,-ասել է նա։
Մևլութ Չավուշօղլուն խոսել է նաև իրենց կողմից Հայաստանից ակնկալվող քայլերի մասին: «Մինչև այս պահը ուղեձներ ու հայտարարություններ կան, ճիշտ է ճնշում էլ կա՝ դրսից Սփյուռքը, ներսից՝ ֆանատիկ խմբերը: Սակայն ինչ վերաբերում է կոնկրետ քայլերին, Հայաստանի կողմից այդ կոնկրետ քայլերը դեռևս չենք տեսել՝ ներառյալ Զանգեզուրի նախագիծը, մյուս նախագծերի կամ համապարփակ խաղաղության պայմանագրի հարցում»,-ասել է նա:
Այսինքն՝ արդեն Փաշինյանի գլխավորած Հայաստանի իշխանությունն այս հարցերում խաղաղության համար դրական քայլեր պետք է անի, խոսքերը բավարար չեն»,-ասել է նա:
