ԵԱՀԿ-ում ԱՄՆ դեսպան Մայքլ Քարփենթերն, անդրադառնալով իրավիճակի սրացմանն Արցախում, մտահոգություն է հայտնել և լարվածության նվազեցման կոչ արել։ Այդ մասին նա գրել է Twitter-ի իր միկրոբլոգում։

«Ես խորապես մտահոգված եմ Լեռնային Ղարաբաղում ու շրջակա տարածքներում բնակվողների անվտանգությամբ՝ այդ տարածքում վերսկսված մարտական գործողությունների մասին հաղորդագրությունների պատճառով։ Մենք չենք ցանկանում վերադարձ լայնամասշտաբ ռազմական գործողություններին, ինչպես 2020-ին էր, և կոչ ենք անում անհապաղ քայլեր ձեռնարկել՝ լարվածությունը թուլացնելու ու հետագա սրացումից խուսափելու համար»,-ասվում է գրառման մեջ։

Օգոստոսի 3-ին՝ ժամը 15:00-ի սահմաններում, շփման գծի հյուսիս-արևմտյան հատվածում ադրբեջանական ստորաբաժանումները կիրառել են նռնականետեր և հարվածային անօդաչու թռչող սարքեր: Հայկական կողմն ունի 2 զոհ և 19 վիրավոր։

Օգոստոսի 1-ին` ժամը 09:00-ից սկսած, Արցախի Հանրապետության հյուսիսային և հյուսիս-արևմտյան սահմանագոտու մի շարք հատվածներում ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով: Օգոստոսի 1-ին ադրբեջանական ստորաբաժանումների կողմից ձեռնարկված սադրանքի հետևանքով վիրավորում էր ստացել ՊԲ զինծառայող Ալբերտ Բախշիյանը։ Նրա կյանքին վտանգ չի սպառնում: Օգոստոսի 2-ին լարվածությունը պահպանվել է։ ‌