Բաքուն հայկական կողմին է հանձնել զոհված 10 հայ զինծառայողի մարմին: Այս մասին հայտնել է ՊՆ մամուլի քարտուղար Արամ Թորոսյանը, տեղեկացնում է Factor.am-ը։

Այլ մանրամասներ նա չի հայտնել:

Սեպտեմբերի 13-ին Բաքվի սանձազերծած ռազմական գործողություններից հետո հայկական կողմը չէր կարողանում Բաքվի վերահսկողության տակ անցած տարածքներից դուրս բերել հայ զինվորների մարմինները, նաև թույլ չէին տալիս փնտրել անհետ կորած համարվող զինվորներին:

Սեպտեմբերի 13-ին՝ ժամը 00:05-ից Ադրբեջանի ԶՈւ ստորաբաժանումները Գորիսի, Կապանի, Ջերմուկի, Վարդենիսի, Սոթքի ուղղությամբ խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ, կիրառվել են նաև ԱԹՍ-ներ, հրետանի, ականանետեր՝ թիրախավորելով թե ռազմական, և թե քաղաքացիական ենթակառուցվածքները։ Սեպտեմբերի 14-ի երեկոյից հրադադար է հաստատվել, սակայն իրավիճակը շարունակում է մնալ լարված։

Հոկտեմբերի 14-ի դրությամբ հայկական կողմը հայտարարել էր 210-ից ավելի զոհի և անհետ կորածի մասին։ Անհետ կորած զինծառայողների թիվը 28 է։