Եպիսկոպոս Բագրատ Գալստանյանը «Դիմադրություն» շարժման ի աջակցություն Արցախի հրավիրած հանրահավաքի ժամանակ ասել է, որ Արցախը երբեք չի լինելու թշնամական տերությունների կազմում։

Գալստանյանն առաջինն է բեմ բարձրացել և հանրահավքի մեկնարկը տվել աղոթքով։

«Ես հավատում եմ մեր հայկական, համազգային օրակարգին։ Թելադրող, բայց ոչ թելադրվող, պարտադրող և ոչ պարտադրվող։ Ես հավատում եմ, որ հայոց եռագույնը պետք է վերստին ծածանվի Քարվաճառի լեռնալանջերին, Արաքսի հովիտներում, Շուշիի և Հադրութի բարձունքներում»,– հայտարարել է նա, գրում է Sputnik Արմենիան։

Նա վստահություն է հայտնել, որ իրական ու հզոր Հայաստանը հաղթելու է կեղծ և ֆեյսբուքյան Հայաստանին, իսկ եռագույնը, ըստ սրբազանի, հաղթելու է սև ու սպիտակին։

Սրբազանը հիշել է, որ 2020–ի այս օրերին Շուշիում էր։

«Ինձ ասում էին` դա վերջին աղոթքն էր, ես ասում եմ` ո՛չ, դա առաջին աղոթքն էր ապագա հաղթանակների համար»,-ասել է նա։

Ավելի վաղ հայտնի դարձավ, որ նոյեմբերի 5-ի երևանյան հանրահավաքի կազմակերպիչների դիմումին ընդառաջ, Ամենայն Հայոց կաթողիկոսի օրհնությամբ, հանրահավաքին կմասնակցի Բագրատ եպիսկոպոս Գալստանյանը։ Այդ մասին հայտնել էր Մայր Աթոռի տեղեկատվական համակարգի տնօրեն տեր Եսայի քահանա Արթենյանը։